ثقب الأوزون وحماوة وطن
    

خالد الناهي 
نسمع تقارير كثيرة عن ارتفاع درجات الحرارة في السنوات الأخيرة، بعض العلماء يعلل ذلك متوهما، بسبب وجود ثقب بالأوزون نتيجة لكثرة الصناعات، وانبعاثات الغازات، مما أدى الى حدوث هذا الثقب.
لكن الحقيقة هذا التقرير " ما أشتري بفلسين" يجوز واحد يسأل ليش؟! ويگلنة مو هذا تحليل علمي، صارفين عليه فلوس ومراكز بحوث هي الأكثر تطور بالعالم.
نگول خل نحلل الموضوع وحدة وحدة ..
أكثر درجات الحرارة ارتفاعا في العالم، حسب التقارير الي تنشرها مراكز الرصد العالمية هي في العراق، حيث تصل الى " خمسين درجة" في كثير من الأحيان 
السؤال هنا ..
ليش العراق؟
اشو العراق الله وكيلكم " استكان چاي " ما يصنع، وخلف الله على الصين ما بقى شي ما صدرته النة, والتاجر العراقي ما يقصر دائماً اردء نوعية يجيبهة, يعني هم صيني وهم ردي.. طبعا المقصود "مو التاجر العراقي الردي" حشاه، التاجر العراقي متدين ويخاف الله، وما يحب الفلوس، اهم شي الشعب وراحته، واصلا الحرائق الي جاي تصير من ورى الأجهزة الكهربائية الفاشلة هو ما الة علاقة بيهة!! نقصد البضاعة الصينية رديئة، اذا ما عدنه صناعة شلون الايزون انثقب مقابيلنه؟!
لكن صراحة الجواب راح نلگي عند رجال عراقي اسمة " أبو خضير" راح يبين بي ليش ثقب الأوزون موجود، وليش مقابل العراق تحديدا 
أبو خضير گاعد يخوط باستكانة الچاي، وينبت بالجگارة بالگهوة، وسمعنة نتكلم عن ثقب الأوزون، وليش العراق تحديدا أكثر بلد بي درجة الحرارة مرتفعة.
گال عمي تسمحولي اتدخل، واعلل سبب الحرارة المرتفعة؟
صراحة باوعنالة وگلنه هذا شنوا يعرف عن الأوزون، لكن خل نسمعه، اشو احنة عطالة بطالة، هو اول وتالي راح يتكلم، حتى لو سمحنالة، هذا طبع العراقي مو بيده.
گال وليداتي سبب ثقب الأوزون لا الصناعات ولا الانبعاثات الحرارية، وصار عشرات السنين العالم تنتج، وتصنع ومن كانت الصناعة على الفحم، ليش هسه نثقب الأوزون؟!
گنالة لعد شنوا السبب؟!
گال وليداتي السبب حماوة هذا الشعب وحكومته" ويقصد شعبنه والحكومة"
گلنالة شلون؟
گال هسه أنتم عمركم بالعشرينات روحوا سألوا اهلكم، گلولهم شنوا اكو مصيبة بالعالم ما مشارك بهيه الشعب العراقي؟
تدرون الشعب العراقي حمة وبعث خمسة وخمسين ألف رسالة للأمام الحسين " بس تعال واحنة وياك" وبعدين كل احنة نعرف النتيجة.
تدرون الشعب العراقي مشترك بالحرب العالمية ومنطي قتلى، ومشترك بحرب "67" بمصر و"73" بسوريا
هسه وين تصير مشكلة وقضية تلگى بيهة عراقيين، تعرفون 
هسه حصار أمريكا على إيران، ندخل على صفحات التواصل الإيرانية نلگاها صور مال سفرات، وعايشين حياتهم بصورة طبيعية، ومتأقلمين مع الوضع، وعدهم ثقة بحكومتهم
واحنه صفحات التواصل مالتنه من رئيس الحكومة للعبد الفقير الگاعد يسولف وياكم، بس مسبة وتخوين وطلايب 
تدرون يا وليداتي لو نبطل حماوة" حكومة وشعب" ونلتهي بس ابلدنة، كان مو بس ثقب الأوزون انسد، چا حتى عين الشمس سديناها من الخير الي بالبلد.
 

محرر الموقع : 2018 - 08 - 13